高重建: 翻牆成本

曾跟朋友說，香港最主要的成本是租金，大陸最主要的成本是翻牆。那雖然是戲言，但實際上也是事實。比如說我的廣州辦公室，光纖上網本來就要比香港貴得多，還要另加「海外帶寬」，逐 M 算。然後加錢翻牆。這還只是辦公室內而已，為了讓同事平時也能真‧上網，還得為所有同事買 VPN，選用市面上公認最好的。但就連這家專業做 VPN 的公司，最近也翻不了牆，可憐我付了一大筆年費給外國勢力，原來買來了過期武器，都沒意識到祖國早已超英趕美。

高重建《RYU VS KEN﹕翻牆背後的成本》

小盛女: 我個樣真係太易恰

話說我今日去街市買生果，「三個橙吖唔該。」然後生果檔大佬求求其其用咗唔夠三秒就掉咗三個橙落袋，收咗我二十蚊。我行咗幾步，覺得唔對路，打開個袋睇吓，發覺三個都爛爛哋，於是我鼓起勇氣走返去，問可唔可以換過個，佢兇神惡殺咁話：「呢啲唔係爛！你唔識睇啫！」同時用咗唔夠兩秒是但換咗個比我，其實我唔明點解買個橙都要受氣，或者我個樣真係太易恰。我係唔識睇啲橙靚唔靚，但起碼都識睇爛唔爛，而且點解我咁懷疑佢呢，就係因為以前試過去街市買蕉，我話唔係好識揀，叫個生果檔阿叔幫我揀，佢仲話呢梳蕉最靚喇阿妹，我當然信到十足十，點知一返屋企搣開，頂！黑心蕉嚟，個心爛，成條都唔食得，仲比阿媽笑我：「好日都唔買蕉，一買就買著爛心蕉，你都算叻女喇！哈哈哈！」

小盛女《其實我真係好驚去街市買餸》

小盛女: 靠直覺十次有九次都會錯

如果路痴也分等級的話，相信我也算是 SSS 級，最常出現的情況是看著地圖，左轉右轉，又回到原點，有時站在路中心，猶豫應該向左走還是向右走時，靠直覺的話，十次有九次都會錯；看地圖的話，成功率為一半半，所以如果趕時間的話我會出絕招 —— 問人！當然問人都有兩成機會會比人老點，所以在此奉勸大家如果不清楚路線的話請不要亂指，說不知道便可。

小盛女《我唔係白癡，我係路癡啫！》

殷琦: 紅 Van 門的開關

其實我有點怕搭霸氣叔的車。因為他真是紅 Van 當法拉利跑車咁揸 —— 車內顛簸非常、飛馳電擊、入路扔彎時一邊轆會飛起、停車時頸後有風，車裡還要是未有安全帶果種。車未停定、門已經「啪」的打開；乘客剛踏出車不到一秒、車門就幾乎又「啪」的關上、再「呼」的一聲呼嘯而過。頭頂的車速顯示器只作點綴用途，它有它叫、霸氣叔有霸氣叔飛速揸法拉利。

殷琦《今夜，我坐上了會屌人老母和與的士賽車的紅 Van》

唐唐: 佢就識嘢啦!

Julian 飲酒有幾叻，可以引述兩年前一次飯局經驗證明。嗰次飯局，唐唐係座上客。食到咁上下，我都唔記得 Julian 講咗啲乜嘢，唐唐就即刻好大反應，指住 Julian 話：「嗱，佢就識嘢啦！」由嗰刻開始，唐唐就捉住 Julian 係咁講酒，指住餐廳個 wine shelf ，逐支紅酒問佢意見。唐英年同你講酒，即係傅家俊請教你篤波。

葉朗程《After Taste》

徐緣: 不斷反問自己

在被不斷反問的過程中，我發現原先問題被逐步解拆，釐清了思路後，最後自己已想出最佳答案。久而久之，訓練到我每次想求教於 T 君時，便不自覺自問一堆問題，腦內進行「問題溯源」，難題往往迎刃而解。相處了一段日子後與 T 君成為好友，我認真感謝這位前輩對我的思想訓練，誰知那時他才說出玄機：「其實我成日反問係因為我諗嘢好慢，我要用反問嚟拖延時間，你一度答，我都一度諗緊答案。而且成日反問，大家怕咗問我嘢，我就樂得清閒。」

徐緣《 學「問」》

山地媽: 港爸嬲豬

話說有次幼稚園生日會，壽星仔爸爸準備了回禮包給全班同學，裡面除了小禮物，還有廣告單張。有家長覺得這樣借學校生日會賣廣告不好，在 WhatsApp group 有所微言，一人一句加把口，說著說著，微言變辯論，辯論變罵戰，最後那位爸爸不作回應就退出群組拂袖而去。男人之家咁易嬲豬，剩下一班師奶面面相覷。在這些動輒三幾十人的群組，一人一句已經不得了，討論得興高采烈（還是面紅耳熱？）時，電話更是叮叮噹噹響個不停。有家長覺得這樣很煩擾，於是離開群組。

山地媽《兩招毒啞 WhatsApp group》

藍橘子: 喺外國無人話佢蠢

我記得上年，iPhone6 開售頭幾日，有個同事用 iPad 買搶到一部自用，第日全公司都笑佢蠢，難得抽到部可以炒雙倍價值嘅手機，竟然唔拎去炒而係自己拿黎用。尤其最激動嘅係清潔阿姐，可能佢前一晚走咗去 Apple Shop 牛仔褲排隊，最後都買唔到電話所以心心不忿，佢直情一手拿住拖把，另一隻手指住個頭話我同事弱智。順帶一提，個清潔阿姐仲用緊按鍵電話。我同事本身就好鍾意玩 gadget 野，亦對炒賣興趣不大，買到新玩具佢寧願自己率先試玩，都唔想為幾千蚊炒完一輪要等幾個月。佢話喺外國讀書時一直都係咁，但無人話過佢蠢，點解喺香港會變成一個連清潔阿姐都睇唔起嘅蠢人？

藍橘子《幾時開始，香港要靠炒賣黎生活？》

王婷：親朋戚友照價八舊

至於婚宴上的表演環節，其實很多人並不抗拒，始終成晚流流長，作為賓客多一個娛樂也好。唱歌跳舞固之平常，朱主席「從不喜歡孤單一個」的唱腔或是娃娃舜的舞姿當然也領教過，但更有表演慾的新人是… 把自己的請帖印成演唱會門票，席上賓客一人一螢光棒充當粉絲，然後表演歌曲不是浪漫情歌，而是浮誇、打得火熱、阿牛……一連五首，絕無廁所位，只是山頂的親朋戚友照價八舊。

王婷《騎呢的婚禮》

蔡瀾: 美國土佬

大量歐洲移民湧到紐約之後，只有兩百年歷史的美國才對歐洲有點認識。經濟起飛，大眾附庸風雅，向歐洲購買了大量文物，紐約人才沒那麼老土。當今美國內陸省份的人還是很閉塞，開化的只有紐約、三藩市、芝加哥等大都市。其他鄉下，如奧克拉荷馬、俄亥俄，甚至巨人省份德薩斯，長的都是一些土佬，連紐約客也看不起他們。

蔡瀾《悶死》

豬柳蛋漢堡

【網上笑話一則.】..

某大快餐連鎖店內:
服務員: 「小姐，請問有乜幫到你？」
我: 「兩個豬柳蛋漢堡丫唔該，加杯大可樂，快。」
服務員: 「豬柳蛋漢堡？要蛋喎 ?」
我呆一呆: 「要蛋 ! 」個蛋才是豬柳蛋的靈魂所在，點可以無。
服務員: 「咁不如換火腿扒漢堡，一樣價錢。」
我: 「唔換啦，我趕時間... 」
服務員: 「唔係嚟，妳真係要蛋喎?!」
我火了: 「豬! 柳! 蛋! 漢! 堡! 」
服務員: 「要蛋喎?!」
我: 「我一定要蛋!!! 」
服務員: 「對唔治小姐，真係要蛋 15 分鐘呀。 」

的士大佬

的士司機大佬: 「去邊呀？」
自由行太太: 「北角侏儒村。」
的士大佬: 「邊度嘩？」
自由行太太: 「英皇道呀！侏儒村呀！」
的士大佬諗我揸左五年港島，未聽過北角有侏儒村。「係咪杏花村呀？」
自由行太太: 「近北角地鐵站的侏儒村呀！」
的士大佬望望後鏡，見佢個樣唔似玩。侏儒村？唔通要 call 上台問路...。「咁我車你去北角地鐵站啦！」
自由行太太: 「我去侏儒村唔係去地鐵站呀，我打的梗係唔識路啦！師傳你地香港人個個都去侏儒村買野架啦！」
的士大佬: 「賣乜架？」
自由行太太指指手上的纸袋 :「買皮褸什麼的，好質料，價錢特別的便宜。」
「哦！」的士大佬望望纸袋:
「原來係 G2000...」

姐死姐還在: 頭頂好似有烏鴉飛過. . .

有一年我喺東京藥妝店買左大量物品，而我除左「係」呢句日文，我咩日文都唔識。我喺保濕噴霧個個架求其買左支噴霧。如事者，我噴左一星期左右，有一日，我同事見到我噴，我就沾沾自喜 mode 問佢噴唔噴，並伸出友誼之手，邀請同 department 嘅女人過來試噴，噴完一大輪，有個識日文嘅女人拎左我支噴霧睇，一睇真係「震驚13億嘅人民」，原來我個支唔係噴面嘅保濕噴霧，而係衣物除臭噴霧。個一刻，所有女人都紛紛衝去廁所洗面，並對我作出咒罵。我真係「紅都面哂」，因為，我已經噴左一個星期。我就好似卡通片入面 D 人咁，頭頂好似有烏鴉飛過。

姐死姐還在《夏天為大地帶來汗水…》

Ms Yu: 連樣子也好像差不多

至於最令老師搞不清的名字大概是近年開始流行、跟 Clarice 讀音近似的名字。曾經一班裏才十多個孩子，有四個女孩分別叫 Carrissa、Clarice、Karis 及  Klarisa，可憐那個叫 Chris 的男孩，整天都覺得老師在叫他。這四位女孩連樣子也好像差不多，所以我花了個多月才弄清楚，之後偶爾仍會搞錯。

Ms Yu《改個好名字》

Why Tipping Should Be Banned - Adam Ruins Everything | CollegeHumor

Adam: "... and right now, you probably hate me for even daring to question the custom of tipping."
Waitress: "Yea, what the fudge!"

葉朗程: 話你戇 X 驚你嬲

Bluff 係講大話嘅最高層次，需要高度的分析力和膽識。至於講大話嘅最低層次，就係俗語所謂嘅「吹水」。一個吹水的人，講大話只有一個目的，就是掩飾心中的自卑感。呢啲吹水精，每個人身邊都總有一兩個。我的一個中學同學，就是吹水精的表表姐。中一嗰陣，佢同我講周慧敏去咗佢生日會；中三嗰陣，佢話鄭伊健間唱片公司簽咗佢；中六仲誇，佢住喺九龍城一個六百呎單位，但係佢同我講佢屋企人嗰間九龍塘獨立屋租緊畀人。

講大話唔係一件容易嘅事，所以喺講大話之前，記住用吓腦。好多時，你嘅朋友唔踢爆你，唔係因為佢哋蠢，而係因為話你戇 X，真係驚你嬲。

葉朗程《瞞神》

王迪詩: 韓妹女友肯定整過

眾人無語，拍拍他的肩膀，投以節哀的眼神。舊同學就有這樣好，一切盡在不言中。不久收到他發來的結婚請帖，娶的是日本太太，我忍不住做了很多錢人情，我覺得這是他應得的，苦盡甘來是最值得慶祝的。

韓妹呢？我有一個男同事交了韓妹女友，周邊的男人都輕輕搥一下他的肩膀，吊起一邊眉毛，故意擠出一副艷羨的表情道：「衰仔呀，今期你最威啦！」然後轉頭在背後冷冷的丟下四個字――「肯定整過」。男人，一方面嘲笑人家的女友整容，內心卻酸溜溜別人的女友整得這麼成功。許多港男以為韓妹都是千頌伊的樣子，萬分羨慕韓國男士，但其實他們交女朋友也遇到不少問題。

 王迪詩《港女是一個 brand》

葵倩鈴: 自己漂亮，旁人嘴歪

「又忙著給妳的兵發照片？」
無論等女神自拍至滿意為止，還是當女神的攝影師，Kandy 也早就慣了。不過她最受不了的是，Lilian 太有愛心，太喜歡照顧弱勢社群 －－ 總是發佈些自己漂亮，旁人卻臉容扭曲、半眨眼、說話時嘴歪，總之在她的個人主頁中，Kandy 長得像個弱智。

葵倩鈴《娘娘是怎樣煉成的？》

阮穎嫻: 我食咗毒撚檸檬

我有個毒撚朋友，雖然未毒到唔出街，但行年 33，一次拖都未拍過，一次手都未拖過，平時除了返工，嗜好是一個人行山，一個人踩車，一個人拿著單反老婆，由尖咀行到深水埗，影途中的街景及女仔。莫講話女人的氣味，女人手背肌膚是怎樣的溫度，佢當然沒有概念，問佢邊條山路好行，邊隻鏡頭景深正採光靚，佢就知。我每次約佢，佢都會遲到，話頭先去咗機舖打機，sorry都無句。同佢講嘢，眼睛不敢直線，總是眈天望地。

每一年情人節他都在 facebook 呻無女，話今年情人節又要一個人過，是毒撚的宿命云云。那一年，我突然想做好心，拯救毒撚。由於男友是經濟學家，所以我哋唔過情人節，而毒撚又想搵女陪，我情人節去陪毒撚就是最好的 resource allocation。

於是我同毒撚哥哥講：「喂喂，不如我情人節約你？」毒撚哥哥不是不知道我有男友，他受寵若驚，不過又應承咗。同毒撚出街做咩好？毒撚出身社運搖籃，左到唔左，要佢幫襯大商家，擁護情人節消費主義，點講都唔啱數。而且，他的錢已貢獻給他的單反、鏡頭、單車…… 要毒撚決定同女仔做乜，你不如叫佢去死。而由於雙方都知我只係想拯救毒撚，讓佢踏出第一步，因此也不好要佢全包。我問佢，你 budget 幾多，佢話：「$200」

我的提議是咁的：首先，我哋去太子一間外賣壽司生蠔的舖頭食嘢加買走，另外我會帶支酒。然後，我哋會由太子行到九龍公園，最後起尖東海邊飲酒，咁應該夠豐富又好玩又抵食，捱到一晚啦。佢應承咗。我以為這個拯救毒撚行動會成功，以後，佢就知道同女仔出街係點，佢唔會再怕女仔，佢慢慢就可以脫毒了。

就 2 月 14 下晝，佢突然 msg 我：「我今晚決定同兄弟去明將打大佬，勿念。」（當年明將仲好 hit）就這樣已經有另一半的我竟然食咗毒撚檸檬 & 被放飛機。

阮穎嫻《情人節拯救毒撚行動》

The Dark Knight- Joker Interrogation