話說我今日去街市買生果，「三個橙吖唔該。」然後生果檔大佬求求其其用咗唔夠三秒就掉咗三個橙落袋，收咗我二十蚊。我行咗幾步，覺得唔對路，打開個袋睇吓，發覺三個都爛爛哋，於是我鼓起勇氣走返去，問可唔可以換過個，佢兇神惡殺咁話：「呢啲唔係爛！你唔識睇啫！」同時用咗唔夠兩秒是但換咗個比我，其實我唔明點解買個橙都要受氣，或者我個樣真係太易恰。我係唔識睇啲橙靚唔靚，但起碼都識睇爛唔爛，而且點解我咁懷疑佢呢，就係因為以前試過去街市買蕉，我話唔係好識揀，叫個生果檔阿叔幫我揀，佢仲話呢梳蕉最靚喇阿妹，我當然信到十足十，點知一返屋企搣開，頂！黑心蕉嚟，個心爛，成條都唔食得，仲比阿媽笑我：「好日都唔買蕉，一買就買著爛心蕉，你都算叻女喇！哈哈哈！」
小盛女《其實我真係好驚去街市買餸》
No comments:
Post a Comment