讀畢整篇專訪，我還是感覺自己掌握不到真正的核心，因為雖然特別售後服務獨樹一幟，但開初無人落搭，何有售後服務可言？為解開這個 Top Sales 之迷，我專登約馮錦強食 Lunch 問過明白。
一頓飯，換來兩點結論。
美國銷售專才Jeffrey Gitomer，著有一本專述銷售法則的作品《Little Red Book of Selling: 12.5 Principles of Sales Greatness》，當中提到重要一點：「成功與不成功銷售的微妙差異，在於嘗試『銷售你有的東西』，與『營造潛在客戶願意買你東西的氣氛』之間的差別。」馮錦強深明此理。
「好多人過嚟第一句就問價錢，不停話要平平平，尤其係一啲師奶，會挑你機話人地收幾十蚊個月，點解你收過百，又會不停問有冇禮品。」
馮錦強解釋，寬頻收費計劃以至贈品都由公司定死，每個 Sales其實擁有相同板斧武器，卻原來有過別 Sales為了拉客，自掏荷包提供超市禮券或其他優惠券。馮錦強不信這套，亦不想貼錢打工，而能成為 Top Sales，是他懂得捉摸潛在客人的心理。
「其實一百幾十對好多師奶根本唔係乜嘢大錢，只不過下意識唔想蝕底，覺得越平越好。我會同佢地講，你個仔依家做功課成日要上網搵資料，若果網絡唔穩定上唔到網做唔到功課，妳話幾大件事。妳俾多少少，都係幫個仔。」
馮錦強話這招萬試萬靈，而且這個方法有不同變招，因人而異。
「見到西裝友，問佢有冇炒股，有就易搞。我會話上網炒股若果斷線，交易差咗一個價位，已經貴過依個 Plan多多聲啦。後生仔仲易，個個玩 Online Game，一班人打 War Game你突然離線，會俾人媽到七彩嫁。」
這就是 Gitomer 所說的「營造潛在客戶願意買你東西的氣氛」。
訪問得出的另一結論，是我發現他的秘密武器 － 學生証。
「一般人對於Sales有戒心，唔多信你，我會在適當時候亮出我嘅學生証，話自己只係想兼職賺錢，唔會呃妳，師奶對依樣嘢特別 Buy。再加上我日日企死一個位，我同佢講妳路過日日見到，點敢呃妳？妳有問題可以隨時行嚟搵我。」與一些 MK味濃的金毛 Sales比較，馮錦強應該是師奶心目中的街霸界馬國明。
買一樣東西，很多時是因為信一個人，跟冧把買股票者都心裡明白。馮錦強的學生証，配合他平凡內斂的外貌與說話方法，產生了能夠取信於人的微妙化學效應。
懂得由客人角度思考，是成功核心之一，讓客人相信自己，是成功核心之二。香江第一街霸Sales，我認為是如此煉成。
徐緣《香江第一街霸Sales之謎》
No comments:
Post a Comment