葉朗程: 咁點有計傾呀？

我的感受是，投身社會後，交朋友的過程，好像暗地裏都附帶着條件。Oh，你做 Deutsche Bank，我做 JP Morgan，有共同話題喎，出嚟飲杯嘢啦，飲幾多食幾多唔緊要，我請，大家啱傾嘛。見多幾次，玩多幾次，熟咗啦，就叫朋友囉。

喂，唔係喎，我做匯豐，你揸的士，大家仲有冇計傾？唔好玩啦，我下個月約咗朋友去瑞士旅行，你有冇錢 join 我？冇呀？咁點有計傾呀？You see，附帶條件的。如果今日葉朗程突然破產然後改行揸綠 van，boom，九成的所謂朋友全部走哂。淨低冇走嗰一成，就是華仁的朋友。所謂兄弟，就是這個層次。

葉朗程《華仁的浪漫》